Boorama(Bnn)xubno odayaal ah oo sheegay inay yihiin gudida deegaanka buuralayda woqooyi ee degmada Boorama ayaa cabasho ka muujiyay waftigii wasiirada ee xukuumadu u soo dirtay masiibadii barafka oo ay sheegeen inay ka leexdeen oo aanay soo marin deegaankooda oo ka mid ah meelihii  dhibaatadu soo gaadhay, iyaga oo siodoo kale sheegay inay wasiiradaasi ka reebeen deegaankooda warbixintii qiimaynta ee ay socdaalkoodii ka dib siiyeen idaacada BBC da.

Xubnahan deegaanka buuralayda degmada Boorama oo ka koobnaa 13 xubnood ayaa ka dayriyay xaalada ay ku sugan yihiin dadka ku dhaqan deegaanka iyo xoolihii tirada yaraa  ee ka samato baxay masiibadii roobabka barafka oo ay sheegeen in ilaa hada dhimashadoodu socoto ka dib markii ay la soo darseen xanuuno iyo tamar daro, dadkuna ay ildaran yihiin oo laftooda xanuuno haleeleen, ilaa imikana aanay hayn wax gar gaar caafimaad ah oo xukuumad ama meel kale uga yimid.

Shir jaraaid oo ay shalay qabteen waxa ay ku yidhaahdeen"waxaanu aad uga xunahay xubnihii wasiirada ee ay ka midka ahaayeen qorshaynta, xanaanada xoolaha iyo wasiiru dawlaha arimaha gudaha iyo xubnihii kale ee la socday oo iska dhinac maray deegaankayaga buuralayda woqooyi oo ka tirsan degmada Boorama oo ah meelihii ay dhibaatada badani ka dhacday oo saxaafada iyo maamulka degmaduba markhaati ka yihiin indhohoodana ay ku soo arkeen, hadaba aniga oo arintaa la yaaban ayaa waxaanu qaadan waynay warbixintii ay ka sii daayeen BBC da oo ay mar kale ka reebeen deegaankayagan oo ay horena isaga dhinac mareen iyaga oo ku soo koobay degmooyinka Baki, Lughaya iyo Saylac"

Waxa kale oo ay sheegeen in xaalada dadka  iyo xoolaha u hadhay dadka deegaankani inay ka sii darayso marba marka ka dambaysa'ilaa hada wax gar gaar caafimaad ma hayno dadka iyo xoolaha inta yar ee hadhay xanuuno ayaa haleelay, xoolaha yar ee hadhay wali way dhimanayaan qabowgiina wali wuu socdaa, waxaana ka mid ah deegaanadaa dhibaatadu saamaysay ee aanu ka hadlayno Dhagaxa madow, Gargooray, Xaliimaale, Weeraar iyo deegaanada kale ee Abase iyo Badanbad oo ay horena uga jirtay abaar aad u bahan dhibaatadanina ay u raacday dadka iyo xooluhuna ay ildaran yihiin, wax gar gaar raashin ahna waxa ilaa hada na soo gaadhay woxoogaa ay culimada Boorama noo keeneen iyo D/hoose oo noo keentay raashin ay ka soo ururiyeen qaybaha degmada Boorama ee aanay dhibaatadu saamayn iyo woxoogaa ay sheegeen in dawladu soo dirtay laakiin marka la eego xaalada meesha ka jirta intaasi waxba kama tarin oo meesha waa lagu caydhoobay xoolihiina dadka way ka dhamaadeen"

Odayadan oo ay ka mid ahaayeen Xaaji Xuseen Xasan Tukaale, Barkhad Ibraahin Barkhad, Ibraahin Isaq Axmed, Siyaad Xuseen Cumar, Barkhad Ibraahin Aare, Saleebaan Suge iyo xubno kale waxa ay ugu dambayntii ugu baaqeen xukuumada, hayadaha samafalka iyo bulshada reer soomaalilandba inay gurmad deg deg ah ooo balaadhan la soo gaadhaan dadka ku tabaalaysan deegaanka woqooyi ee degmada Boorama iyo deegaanada kale ee gobolka ee ay masiibadani saamaysay, iyaga oo baahida ugu weyn ku sheegay  gar gaar caafimaad si loo bad baadiyo dadka iyo xoolaha yar ee hadhay, iyo gar gaar cunto maadaama ay dadka tabar yarida abaaro u raaceen.

Cabdiraxmaan Maxamad Habane
(Bnn)Borama News Network
Boramanews.com