Boorama(Bnn)Magaalada
Boorama oo mudo sanado ah ka raysatay adeeg xumada
biyaha, ka dib markii wakaaladii biyaha lagu
wareejiyay shirkad ay leeyihiin ganacsato, ayay
hadda soo food saartay biyo yaraan.
Shirkada ganacsatada oo la yidhaa SHABA, waxay si
wanaagsan oo hufan u soo waday maamulka iyo
balaadhinta biyaha magaalada, Shirkada SHABA hada
waxay gacanta ku haysaa mudo 5 sano ah, mudadaas ay
gacanta ku hayeen waxay iska xilsaareen in ay
bulshada tusaan sida ay uga wanaagsan yihiin gacan
ku hayntii dawlada, taas oo dadweynuhuna u markhaati
fureen, ka dib markii ay waayeen biyo go'a iyo
mashiin xumaada.
Hadaba Sanadkan 2008 wuxuu ugu bilaabmay shirkada
SHABA mid cidhiidhi ah, isla markaana ceelashii ay
gacanta ku hayeen mid ka mid ahi gudho, ceelasha ay
gacanta ku hayeen ee kalana ay hoos u dhaceen
biyahoodu, inta badan waxay sheegaan masuuliyiinta
SHABA in uu ku yimid hoos u dhac xaga biyaha ah,
ceelasha oo qodan 70 mtir iyo iyaga oo 4 ceel oo
keliya gacanta ku haya, halka 4 ceel oo kalana ay
haystaan dad beeralay ah iyo mid jaamacada Camuud
waraabiya, dhamaanba 8 ceel waxa qoday companay laga
lahaa wadanka China sanadihii 1987kii,
Dhanka kale magaalada Boorama ayaa lagu qiiyaasaa
dadka ku nool magaalada gudaheeda iyo Agagaarkeeda
250kun - 300kun oo qof, wakhtigan lagu jiro oo abaar
ah ayaa waxa magaalada ku soo aroora deegaano
xoolalay ah oo ilaa 20km xaga galbeedka ka xiga oo
ay Boorama ugu dhawdahay biyo.
Xaalku si kasta oo uu yahay waxa hada magaalada soo
food saaray biyo yaraan aan hore loo arag, waxaanad
dareemaysaa sida xaafadaha magaaladu ka tirsan tahay
kolba xaafad loo sii daynayo biyaha, xaafad kalana
laga xidhayo biyaha, dadka shacabka ah ayaa si weyn
u dareemay waxayna is weydiinayaan waxa ku dhacay
biyihii ay sida fiican sanadada u heli jireen ?
shirkada SHABA ayaa laba bilood ka hor saxaafada u
sheegtay in ay sahamin ceelal cusub iyo qiyaasba
samaynayaan, si mustaqbalka dambe loogu fikiro sidii
magaalada loogu heli lahaa biyo ku filan, balse inta
badan waxaad dareemaysaa in doorkii dawlada dhexe
iyo dawlada hoose ku lahayd adeega biyaha ee Borama
ay ku koobanaatay cashuurta iyo boqolkiiba inta laga
siiyo dakhliga soo gala shirkada SHABA, waxa kale oo
aad la isku weydiinayaa sababta 4ta ceel ee dadka
shacabka ah iska haystaan dawladu ugu wareejin
weyday shirkada SHABA, taas oo ahayd mid ku jirtay
heshiiskii ay kula wareegatay shirkadu adeega biyaha
magaalada.
Hadii ay shirkadu heli lahayd in ay 4 ceel la
wareegto waxa yaraan lahayd dhibaatada biyo yaraanta
ah ee soo foodsaartay magaalada Boorama. Hadaba
calaamad su'aal ayaa saaran sababta dad shacab ahi u
haystaan ceelal ay dawladu leedahay oo loo qoday
dadweynaha, waxayna bulshadu jawaab ka sugaysaa
Dhanka dawlada ujeedada laga leeyahay in 3 ceel laga
waraabiyo umad dhan oo kor u dhaaftay dhawr boqol oo
kun, 4ta ceelna ay ka cabaan 4 beerood IWM ?
Shirkada SHABA ayaan weli qiimaha biyaha kor u
qaadin mitir kuyuubkana siisa 6000 shilin oo u
dhiganta hal doolar, qiimahaas oo weli dulsaar ugu
jiro dhaqaale kabka jamaacada Camuud.
Awdalnews
