Hargaysa (Bnn) Gudidii
golaha wasiirada ee xukuumaddu u saartay xal u
helida muranka siyaasadeed ayaa la sheegay inay
maanta u soo jeedinayaan Madaxweynaha talooyin ku
saabsan xal u helida ismariwaaga siyaasadeed, kadib
markii ay shalay ilaa xalay kulmo isdabajoog ah ka
yeesheen furdaaminta xaaladda Siyaasadeed ee dalka.
Sida warku sheegay xubnahan wasiirada ahi talooyinka
ay soo jeedinayaan waxa ka mid ah in doorashadii
madaxtinamadu dhacdo 31ka Diisambar sidii hore loogu
heshiiyey, doorashada golaha deegaankuna dhacdo
bisha April 6-deeda ee Sanadka dambe oo la soo
hormariyo ta Madaxtinimada, Sidaana waxa sheegay
warar lagu kalsoonyahay oo aanu xalay ka helnay illo
ku dhodhow kulamadaasi, gaar ahaana dhinaca
mucaaradka ah waxaanay intaa ku dareen in
talooyinkani aanay ilaa hadda gaadhin Madaxweynaha.
Sida warku sheegay waxa kulankaasi lagu falanqeeyay
wax yaabaha ka soo baxay qoraaladii garnaqsiga ahaa
ee labada dhinac ee Xukuumadda iyo xisbiyada
Mucaaradku u kala gudbiyeen gudoomiyaha Golaha
wakiilada iyo hadaladii kulkululaa ee labada dhinac
isku weydaarsadeen maalmahan warbaahinta oo qolo
waliba ku adkaysanayso mawqifkeeda ay ka taagantahay
xal u helida muranka aloosan.
Warku waxa uu intaa kuday in go’aanadii ka soo baxay
kumadaasi ay xukuumadu yeelatay in maanta laga yaabo
inay war sugan ka soo saarto, kaasoo dhalinkara in
wax iska bedelaan mawqifkii kala durugsanaa ee
labada dhinac, mase cada waxa ay ka yeeli doonaan
arrintan xisbiyada Mucaaradka ahi.
Sida la sheegay kulan kale oo ka duwan kan
xukuumadda ayaa xalay loo balansanaa inuudhexmaro
madaxweyne Rayaale iyo gudoomiyaha Golaha wakiilada
cabdiraxmaan Cirro, balse wax war ah lagama soo
saarin inuu kulankaasi qabsoomay iyo in kale.
Source:Waheen
