Jaamacada Arabta ayaa shalay
go'aansatay in ay u dirto guddi xaqiiqa raadin ah
xadka lagu muransan yahay ee u dhexeeya Djibouti iyo
Ertrea si loo qiimeeyo xaaladda iyo si loogu soo
diyaariyo warbixin Jaamacadda Carabta, iyada oo uu
hogaaminayo howshaasi xoghayaha Arrimaha Siyaasada
Jaamacada Carabta Safiir Ahamed Ben Hely.
Safiir Ahamed Ben Hely ayaa Axadii la soo dhaafay
sheegay in " Golaha Amniga ee Jaamacada Carabta
ansixiyeen codsiga Djibouti ee ku saabsan in loo soo
diro guddi xaliya khilaafka u dhexeeya labada dal".
Goluhu waxa ay ka doodeen khilaafka u dhexeeya
Djibouti iyo Eritrea kullankoodii ugu horeeyey heer
ergo. waa Siduu hadalka u dhigaye,
Ben Hely ayaa shaaca ka qaaday in uu la kulmi doono
safiirada ka socda labada dal si loo baaro hababka
loo qaboojin lahaa dareenka iyo in laga hortago in
uu si deg deg ah u balaarto khilaafka.
"Goluhu ayaa ugu baaqay in Djibouti iyo Eritrea in
ay xakameeyaan arrinta xuduuda iyo in la raadiyo
sidii qaab nabadeed loogu xalin lahaa" ayuu hoosta
ka xariiqay safiirka
Golaha ammaanka ee Jaamacadda Carabta ayaa muujiyey
in loo baahan yahay in la ixtiraamo xeerarka deris
wanaaga ee u dhexeeya labada dal, inaan lagu sameyn
wax is bedel ah xuduudii jirtay xilligii xoriyadda
iyo in la ixtiraamo midnimada iyo xuduud wadaaga.
Goluhu ayaa sidoo kale ka codsaday xoghayaha guud ee
Jaamacadda Carabta Amir Mussa in uu la xiriiro
garabyada ay khuseydo arrintan , Gudoomiyaha Midowga
Afrika iyo Golaha Ammaanka ee Midowga Afrika si loo
adkeeyo ammaanka ka dhexeeya carabta iyo afrikanka.
Arrintan ayaa waxa ay kusoo beegmaysa xilli uu soo
cusboonaaday khilaaf xuduudeedka u dhexeeya labada
dal Djibouti iyo Eritrea.
