Friday, 14 September 2018 11:29

Gabdho Walaalo Ah Oo U Geeriyooday Gudiin Lagu Sameeyay + Deegaanka Ay Ku Noolaayeen Labada Gabdhood Iyo Magacaantooda Oo La Shaaciyay

14/09/2018(BNN) Wararka kasoo baxay deegaannada maamulka Puntland ayaa sheegaya in Laba gabdhood oo walaalo ah ay ku geeriyoodeen halkaasi, kadib markii xubnaha taranka lagaga sameeyay gudniinka fircooniga ah.

Labadan gabdhood ee walaalaha ah ayaa lagu kala magacaabi jiray Khadiija Cabdi Warsame oo 11 jir ahayd iyo walaasheed Aasiya oo 10 sano jir ahayd, sida ay sheegtay Xaawa Aadan Maxamed oo u dhaqaaqda ka hortagga gudniinka fircooniga ah.

Geerida labadan gabdhood ee walaalaha ah ayaa dhacday 11-kii September kadib markii lagu guday meel la yidhaahdo Arawada oo maamulka Puntland ka tiran.

Xaawa oo maamusha xarun waxbarasho oo ku taalla gaalkacayo ayaa sheegtay in labada hablood ay dhiigbaxayeen saacado badan markii la guday, waxaana ay geeriyoodeen intii hooyadood ay cisbitaalka u sii wadday.

“Nasiibdarro ma aysan gaarin isbitaalka, waxaana ay dhinteen intii ay waddada ku jireen” ayey tidhi Xaawa oo ku baaqday in dowladda ay soo saarto sharci mamnuucaya gudniinka.

Falalka noocan ah ayaa kusoo noqnoqda Gobollada Soomaaliya waxaana sidan oo kale deegaannada Puntland laba bilood ka hor ugu geeriyootay gabadh yar oo lagu sameeyay gudniinka Fircooniga ah, taasi oo ku geeriyootay cisbitaal ay dhakhaatiirtu kula tacaalayeen xaaladdeeda.

 

Xafiiska Wararka BoramaNews
BoramaNews.com

We use cookies to improve our website and your experience when using it. Cookies used for the essential operation of this site have already been set. Cookie policy. I accept cookies from this site.Agree