Israa’iil ayaa duqeymo cirka ah ka wadda Lubnaan, waxayna xaddidaysaa isu imaatinnada magaalada Haifa iyo deegaannada kale ee waqooyiga, iyadoo ay weli sii waddo weerarrada ay ku bartilmaameedsanayso ururka Xisbullah.
Daraasiin diyaarado dagaal ah ayaa bilaabay inay “si ba’an” u duqeeyaan koonfurta Lubnaan “kadib markii la ogaaday in Xisbullah isku diyaarinaysa inay soo weerarto dhulka Israa’iil sida uu sheegay afhayeenka ciidamada difaaca Israa’iil Daniel Hagari
Weerarkii ugu dambeeyay ee Israa’iil ayaa imaanaya maalin kadib markii ay weerar dhanka cirka ah ka fulisay Beirut, kaasoo ay ciidamada Israa’iil ee IDF sheegtay in lagu dilay tobaneeyo taliyeyaal sare oo katirsan Xisbullah. Lubnaan waxay sheegtay in 37 qof – oo ay ku jiraan saddex carruur ah la dilay.
Dawladda Maraykanku waxay ku boorinaysaa muwaadiniinteeda halkaas ku sugan inay ka baxaan.
Jimcihii, ayaa waxaa dib u bilowday rasaasta ay is weydaarsanayaan labada dhinac ee Israa’iil iyo Xisbullah
Ka hor intaysan fiidnimadii bilaabanin duqaymaha Israa’iil, IDF waxay sheegtay mar sii horreysay inay burburisay “qiyaastii 180 goobood iyo kumannaan gantaallo ah ” oo ay duqaymo ku qaadeen.
IDF, ayaa sidoo kale sheegtay in ka badan 90 gantaal lagu soo riday dhulka Israa’iil kuwaas oo laga soo ganay dhanka Lubnaan. Ururka Xisbullah ayaa sheegay in ay bartilmaansadeen 11 goobood oo ay ku sugnaayeen ciidamada Israa’iil.
Habeenimadii Sabtida, Xisbullah, waxay sheegtay inay tobanaan gantaal ku soo tuurtay saldhigga Ramat David Airbase ee waqooyiga Israa’iil si ay uga aargoosato weerarrada Israa’iil.
Horraantii toddobaadkan, 39 qof ayaa la dilay, kumanaan kalena waa lagu dhaawacay ka dib markii la qarxiyey aalado isgaarsiineed oo ay isticmaalayeen Xisbullah.
Khamiistii, hoggaamiyaha Xisbullah, Xasan Nasrallah ayaa weerarradaas ku eedeeyay Israa’iil, isagoo sheegay inay ka gudbeen “dhammaan khadadka cas” wuxuuna wacad ku maray “ciqaab cadaalad ah”.
Israa’iil ma sheegan mas’uuliyadda.
Madaxa xuquuqul insaanka ee Qaramada Midoobay Volker Türk, ayaa sheegay in qaraxyada aalada pager iyo walkie-talkie ay jabiyeen sharciga caalamiga ah ee bini’aadantinimada.
Sabtidii, IDF waxay ku dhawaaqday xannibaadyo cusub oo lagu soo rogay bulshooyinka waqooyiga Israa’iil iyo qaybo ka mid ah buuraha Golan Heights oo bilaabmaya 20:30 wakhtiga maxalliga ah.
Ciidamada Israa’iil waxay ku koobtay isu imaatinka 30 ka-qaybgale oo meel bannaan ah iyo 300 oo ka qaybgalayaal ah oo isugu imaan kara meel xiran.
Xayiraadaha ayaa quseeya aagga Haifa iyo dhanka waqooyi.
Iyadoo ay sii kordhayso cabsida laga qabo in isku dhacu uu ka qarxo dagaal culus, wasaaradda arrimaha dibadda ee Mareykanka ayaa soo saartay talo socdaal oo cusub oo loogu talagalay muwaadiniinta hadda ku sugan Lubnaan.
Safaaradda Mareykanka ee Beirut ayaa dadka ku boorisay inay “ka baxaan Lubnaan iyadoo ay wali jiraan fursadaha “, iyadoo xustay inay mar hore ku socdeen “awood yar”.
Safaaradda ayaa intaa ku dartay “waxaa laga yaabaa inaysan awoodin inay caawiso muwaadiniinta Mareykanka ee doorta inay sii joogaan”.
Wasaaradda arrimaha dibadda ee dalka deriska la ah ee Urdun ayaa soo saartay talooyin la mid ah muwaadiniinteeda, iyadoo ku boorisay kuwa ku sugan Lubnaan inay sida ugu dhaqsaha badan uga baxaan.
Dagaalka xudduudaha u dhexeeya ee u dhexeeya Israa’iil iyo Xisbullah ayaa sii kordhay 8-dii Oktoobar 2023 -kii maalin ka dib weerarkii Israa’iil ay ku qaadeen rag hubaysan oo Xamaas ah oo ka yimid Qasa.
Israa’iil ayaa dhawaan ku dartay liiska yoolalka dagaalka dib u soo laabashada dadka ka barakacay waqooyiga dalkaas oo ay sabab u tahay dagaallada ka socda xudduudaha.
Wasiirka difaaca Yoav Gallant ayaa sheegay Khamiistii in Israa’iil ay galayso “waji cusub oo dagaalka” iyada oo xooga saaraysa dadaalkeeda waqooyiga.
Qaraxyadii aaladaha dhacay Talaadadii iyo Arbacadii, 152 qof ayaa weli ku sugan xaalad halis ah 777 kalena waxaa lagu daweynayaa isbitaal dhaawacyadooda, sida ay sheegtay wasaaradda caafimaadka ee Lubnaan.
