Madaxweynaha Shiinaha Xi Jinping iyo dhiggiisa Ruushka Vladimir Putin ayaa shir ku yeeshay hab muuqaal ah saacado yar kadib markii Donald Trump la caleema saaray Isniintii, iyagoo ballan qaaday inay xiriirkooda gaarsiin doonaan “heerkii ugu sarreeyay”, sida ay sheegtay warbaahinta dowladaha labada dhinac.
Madaxweynaha Ruushka ayaa Xi ugu yeeray “saaxiib qaali ah”, Putin wuxuu sheegay in Ruushka iyo Shiinaha ay dhisayaan xiriir “ku saleysan saaxiibtinimo, kalsooni iyo caawimaad labada dhinac” inkastoo cadaadis dibadda ah uu jiro.
Xi ayaa ugu baaqay Putin “inuu sii wado xoojinta isuduwidda istiraatijiyadeed, xoojinta taageerada labada dhinac, iyo ilaalinta danaha sharciga ah”.
Trump ayaa Talaadadii ku hanjabay inuu canshuuro ku soo rogi doono Beijing, wuxuuna ku tilmaamay “ku xadgudub” Mareykanka, wuxuuna ka digay in “dhibaato weyn” ay ku imaan doonto Moscow haddii aysan sameynin heshiis lagu soo afjarayo dagaalka Ukraine.
Putin ayaa u sheegay Xi, in xal kasta oo Ukraine “ay tahay in la ixtiraamo danaha Ruushka”, sida uu sheegay lataliyaha arrimaha dibadda Yuri Ushakov oo warfidiyeenka la hadlay.
Beijing ayaa lagu eedeeyay in ay taageero militari siisay Moscow iyada oo siisay gargaar muhiim u ah dagaalka Ukraine.
Ganacsiga u dhexeeya labada dal ayaa gaaray rikoor dhan 240 bilyan oo doolar sanadkii 2023-ka, taasoo kor u kacday 64% tan iyo 2021-kii, ka hor inta uusan Ruushka weerarin Ukraine.
