Ra’iisul Wasaaraha Xukuumadda Federaalka Soomaaliya Xamsa Cabdi Barre, ayaa xafiiska ku qaabilay Guddoomiyaha Guddiga Midowga Afrika Maxamuud Cali Yuusuf, isaga oo maanta booqasho shaqo ku soo gaaray Magaalada Muqdisho.
Ra’iisul Wasaare Xamsa iyo Guddoomiyaha Guddiga Midowga Afrika ayaa kulankooda uga wada hadlay xoojinta xiriirka iyo wadashaqeynta u dhaxeysa Midowga Afrika iyo Soomaaliya.
Sidoo kale, kulanka ayaa waxaa si gaar ah loogu lafaguray arrimaha amniga, dagaalka ka dhanka ah Al-shabaab iyo doorka hawlgalka cusub ee AUSSOM ee Midowga Afrika.
Ra’iisul Wasaare Xamsa, ayaa uga mahadceliyay Guddoomiyaha in uu safarkiisii ugu horreeyay ku yimaado Muqdisho, taas oo muujineysa ahmiyadda uu Midowga Afrika u leeyahay Soomaaliya, isaga oo carrabka ku dhuftay guulaha ay dowladda Soomaaliyeed ka gaartay dhinacyo kala duwan, gaar ahaan dagaalka ka dhanka ah Al-shabaab.
Dhanka kale, Guddoomiyaha Guddiga Midowga Afrika Maxamuud Cali Yusuf ayaa dhinaciisa ka mahadceliyay soo dhaweynta diirran ee loo sameeyay isaga iyo wafdigiisa, isaga oo sheegay in ay sii wadi doonaan taageerada ay la garab taagan yihiin dowladda iyo shacabka Soomaaliyeed.
Guddoomiyaha Guddiga Midowga Afrika Maxamuud Cali Yusuf ayaa maanta magaalada Muqdisho ku soo gaaray booqasho shaqo oo laba maalmood ah, isaga oo kulamo muhiim ah la qaadan doona Madaxweynaha Dowladda Federaalka Soomaaliya Xasan Sheekh.
