Ra’iisul Wasaaraha Xukuumadda Federaalka Soomaaliya, Xamse Cabdi Barre, ayaa magaalada Laascaanood kulan kula yeeshay Isimada dhaqanka ee deegaannada SSC-Khaatumo.
Kulankan ayaa diiradda lagu saaray xoojinta midnimada qaranka, geeddi-socodka nabadda, dib-u-heshiisiinta, iyo xasilloonida guud ee dalka.
Sida uu ku sheegay qoraal ka soo baxay Xafiiska Ra’iisul Wasaaraha, Xamse Cabdi Barre ayaa dhageystay talooyin dhaxal-gal ah oo ay bixiyeen Isimada, kuwaas oo la xiriiray dib-u-dhiska dalka iyo sidii loo xaqiijin lahaa in hey’adaha dowladda si buuxda uga hirgalaan deegaannada SSC-Khaatumo, si bulshada halkaas ku dhaqan ay u helaan adeegyada aasaasiga ah ee ay u baahan yihiin.
Ra’iisul Wasaaraha ayaa uga mahadceliyey Isimada kaalintooda muuqata ee nabadaynta iyo ilaalinta midnimada Soomaaliyeed, isagoo carrabka ku adkeeyey sida Xukuumaddiisu mudnaan gaar ah u siineyso horumarinta hey’adaha dowladda iyo adkeynta wadajirka ummadda.
Kulankan ayaa qeyb ka ah dadaallada joogtada ah ee Xukuumadda Federaalka Soomaaliya ay ku dooneyso in ay ku xaqiijiso nabada gobolada SSC Khaatumo oo laba sano dagaallo ka socdeen.
