Maraykanka Oo Si Adag Uga Cadhooday Weerar Lagu Qaaday Saldhig Uu Ku Leeyahay Dalka Ciraaq

Dowladda Mareykanka ayaa ku gooddisay in ay “la xitaabtami doonto dadka mas’uulka ka ah” weerar loo adeegsaday gantaallo oo Isniinrtii lagu qaaday gobolka Kurdistan ee dalka Ciraaq, kaasoo lagu dilay qandaraasle rayid ah.

Askari ka tirsan ciidamada Mareykanka iyo shan qandaraasle oo kale ayaa ku dhaawacmay weerarkaas oo lagu bartilmaameedsaday magaalada Irbil, oo uu ku yaallo saldhig ay isticmaalaan isbahaysiga uu hoggaamiyo Mareykanka.

Bayaan uu soo saaray Wasiirka Arrimaha Dibadda ee Mareykanka, Antony Blinken ayaa lagu sheegay in xukuumadda Washington ay “ka carootay” weerarkaas.

Koox aan horay loo sii aqoonin Iiraan gacan saar la leh ayaa sheegatay in ay weerarkaas fulisay.

Qandaraasleyaasha dilka iyo dhaawaca loo geystay ayaa lasoo tabiyay in ay dhammaantood yihiin ajaanib.

Mas’uuliyiinta maxalliga ah ee Kurdiyiinta ayaa sheegay in saddex ruux oo kale lagu dhaawacay gantaallada ku dhacay gudaha magaalada Irbil, mid ka mid ahna uu dhaawiciisa halis yahay.

Garoonka diyaaradaha ee magaaladaas ayaa la xiray markii uu weerarka dhacay kaddib.

Madaxweynaha Ciraaq, Barham Salih ayaa sheegay in waxa dhacay uu ahaa “weerar argagixiso oo ay dambiileyaal geysteen”, wuxuuna ka digay “in xaaladdu ay gaarto meel halis ah” haddii gobolkaas uu qalalaasaha kasii socdo.

Waxaa la aaminsan yahay in weerarkan uu yahay kii ugu horreeyay ee reer Galbeedka lagu beegsado tan iyo markii uu bishii lasoo dhaafay xilka qabtay madaxweynaha Mareykanka, Joe Biden.

Xafiiska Wararka BoramaNews

BoramaNews.com

Related posts

Dagaal Culus Oo Markale Ka Qarxay Deegaanada Waqooyiga Dalka Itoobiya

Bnnstaff Bnnstaff

TPLF Oo Lagu Eedeeyay In Ay Dad Shacab Ah Ku Laysay Deegaan Ka Tirsan Gobolka Amxaarada

Bnnstaff Bnnstaff

Dagaalka Nagorno-Karabakh Wuxuu Ku Dul Dhacayaa Laba Shacab Oo Dhulkooda Hooyo Deggan

Bnnstaff Bnnstaff

This website uses cookies to improve your experience. We'll assume you're ok with this, but you can opt-out if you wish. Accept Read More