Baarlamaanka Azerbaijan ayaa ansixiyay heshiis iskaashi militari ah oo dhex maray dowladda Federaalka Soomaaliya iyo Jamhuuriyadda Azerbaijan.
Heshiiskan, oo Madaxda labada dal ku kala saxiixdeen magaalada Baku 12-kii Febraayo 2025, ayaa horseedaya xoojinta xiriirka labada dal ee dhanka difaaca iyo amniga.
Guddoomiyaha Guddiga Difaaca ee Baarlamaanka Azerbaijan, Arzu Naghiyev, ayaa ku tilmaamay heshiiska lagu hormarin karo xiriirka istaraatiijiga ah ee u dhexeeya Soomaaliya iyo Azerbaijan.
Waxa uu xusay in iskaashigan uu faa’iido u yeelan doono labada dal, gaar ahaan marka la eego baahida Soomaaliya u qabto dhisidda iyo tayeynta awooddeeda difaac.
Madaxweynayaasha labada dal, Xasan Sheekh Maxamuud iyo Ilham Aliyev, ayaa taageeray dadaallada lagu xoojinayo xiriirka labada waddan, iyagoo caddeeyay in heshiiskani yahay bilow cusub oo ku saabsan iskaashi amni iyo mid diblomaasiyadeed.
