Guddoomiyaha Xiriirka Soomaaliyeed ee Kubadda Cagta Cali Cabdi Maxamed Cali Shiino oo kamid ahaa madaxdii goobjooga ka noqotay kulan-ciyaareedkii lagu soo gabagabeeyay tartanka xulalka Afrika ee AFCON 2023 ayaa la kulmay qaar kamid ah madaxdii lagu casuumay kulankaas.
Cali Shiino ayaa kulan gaar ah oo waqti kooban ah la qaatay Madaxweynaha Hay’adda Kubadda Cagta Adduunka ee FIFA loosoo gaabiyo Gianni Infantino & Arsene Wegner oo ah Tababarihii hore ee Kooxda Kubadda Cagta Arsenal ayay uga wada hadleen horumarka cayaaraha Soomaaliya.
Qoraal kooban oo lasoo dhigay barta Xiriirka Soomaaliyeed ee Kubadda Cagta oo lagu faah-faahiyay waxyaabaha kasoo baxay kulamadaas ayaa lagu sheegay in Infantino & Wenger ay amaaneen horumarka kubadda Cagta Soomaaliya.
Cali Cabdi Maxamed Cali Shiino Guddoomiyaha Xiriirka Soomaaliyeed ee Kubadda Cagta ayaa madaxweynaha FIFA waxa uu warbixin ka siiyay tallaabooyinkii ugu dambeeyay ay Soomaaliya u qaadday dhinaca horumarinta Cayaaraha.
Waxa uu u sheegay in Soomaaliya ay sanadkaan wajahayso kulamo waa wayn oo isugu jira heer caalami & kuwa qaaradeed, xiriirka ayaa hoosta ka xariiqay in uu isticmaali doonno ciyaartoyda gudaha iyo dibadda si la isugu dheeli-tiro tayadooda.
