Warar dheeraad ah ayaa laga helayaa Qarax Is-miidaamin ah oo ka dhacay Isgoyska ceel-gaabta ee Magaalada Caasimadda ah ee Muqdisho gaar ahaan Iridka hore ee laga galo Xarunta Madaxtooyada Soomaaliya.
Qaraxaas ayaa waxaa loo adeegsaday gaari laga soo buuxiyay waxyaabaha qarxa oo weli noociisu la aqoonsan, isla markaana waxaa uu ku dhex qarxay gaadiid taagnaa Barta koontarool ee lagu hubiyo gaadiidka gala Xarunta Madaxtooyada.
Khasaaro isugu jira dhimasho iyo dhaawac ayaa ka dhashay qaraxa oo gaaray Askar iyo dad shacab ah oo ku sugnaa goobta uu qaraxu ka dhacay, waxaana jugta qaraxa siweyn looga maqlay inta badan degmooyinka Gobolka Banaadir.
Sawirro la soo qaaday ayaa muujiyay burbur gaaray gaadiidkii taagnaa Barta Koontarool iyo Mooto Bajaajyo mararay wadada Isgoyska Ceeb-gaabta, iyadoona dab xoogan uu qabsaday gaari nooca raaxada ah oo loo maleynayo inay dad saarnaayeen.
Sidoo kale goobta ayaa waxaa gaaray gaadiidka dab demiska Maamulka Gobolka Banaadir oo demiyay dabkii ka dhashay qaraxa, waxaana tegay gaadiidka gurmadka deg dega ah lagu daad-gureeyay dad dhaawacyo kala duwan soo gaareen
Ciidanka Booliska dowladda Federaalka Soomaaliya ayaa isku gadaamay aaga uu qaraxu ka dhacay,, iyagoona xiray wadada, isla markaana waxaa halkaas loo ogyahay oo kaliya gaadiidka gurmadka sameeynayo iyo kuwa Booliska.
Xafiiska Wararka BoramaNews
BoramaNews.com
