Doorashada xildhibaanada golaha Shacabka ayaa ka socota inta badan caasimadda maamul goboleedyadda, waxaana soo baxay xildhibaano cusub oo kusoo biiri donna golaha Shacabka xilli qaarkood aan la shaacin tartanka kuraastooda.
Guud ahaan kuraasta la doortay ee xildhibaanada Golaha Shacabka ayaa gaaraya 101 Mudane, waxaana dhiman 174 oo mudane kuwaasoo intooda badan ay kuraastoodu taallo meelo ka baxsan caasimadda maamul goboleedyadda ama magaalada labaad ee doorashada loo asteeyay.
Doorashada gobollada Waqooyi ayaa hoggaaminaysa in ay tahay meesha ugu badan ee lagu doortay xildhibaanada golaha Shacabka, waxaana taalla 46 kursi waxaa la doortay 28 Mudane, Siddeed kursi waa Dumar.
Maamulka Koonfur Galbeed waxaa taalla 69 kursi waxaa la doortay 24 Mudane, todobo kursi ayaa dumar ah
Jubbaland waxaa taalla 43 kursi waxaa la doortay 15 ka mid ah, labo xubnood ayaa dumar ah.
Puntland waxaa taalla 37 waxaa la doortay 15 xildhibaan, waxaa dumar ah Afar kursi
Galmudug waxaa taalla 37 waxaa la doortay 13 Xildhibaan hal kursi ayaa dumar ah.
Kuraasta beellaha banaaniga wali waxba lagama dooran.
Hirshabeelle waxaa taalla 38 waxaa la doortay 6 kursi Xildhibaan Saddex kursi ayaa dumar ah.
Wali ma jirto magaalo ka baxsan caasimadda maamulada oo doorashada ay ka bilaabatay waxaana wali ka socota, marka laga reebo maamulka Koonfur galbeed oo shaaciyay in dhawaan uu qaban doono doorashada 13 oo lagu dooran doono Magaalada Baraawe.
Waqtigii ay ku heshiiyeen golaha wadatashiga qaran in lasoo afjaro doorashada xildhibaanada golaha Shacabka ayaa ku eg 25-ka bishaan waxaa ka dhiman 20 maalmood.
