Duqeymo dhanka cirka ah ayaa Israa’iil ay ka fulisay bartamaha magaalada Qasa, saacado kadib markii militariga Israa’iil ay soo saareen amar lagu daadgureynayo dadka reer Falastiin ee ku sugan halkaasi. Boqolaal qoys oo falastiiniyiin ah ayaa u qaxay dhanka galbeed iyagoo tix raacaya hadalka ka soo yeeray ciidamada.
Milatariga Israa’iil ayaa sheegay in ay ka jawaabayaan hanjabaad kasoo cusboonaatay Xamaas iyo kooxaha kale ee hubaysan ee Falastiiniyiinta ee ku sugan Qasa. Iyadoo rajada laga qabo heshiis xabbad-joojin ah oo Qasa ka hirgala ay dib u soo noolaatay, ayaa xafiiska raysal wasaaraha Israa’iil uu soo saaray bayaan uu ku sheegayo in heshiis kasta oo noocaas ah uu u ogolaado Israa’iil inay dib u bilowdo dagaalka ilaa laga gaarayo dhammaan ujeedooyinkooda.
Waxaa jira warar sheegaya in madaxa sirdoonka gudaha ee Israa’iil, Ronen Bar, uu u duulay Masar si uu u sii wado wadahadallada lagu doonayo in lagu gaaro heshiis xabbad-joojin ah oo dhex mara Israa’iil iyo Xamaas.
