Wasiirka Wasaaradda warfaafinta iyo Tignoolajiydda Maamulka SSC-Khaatumo Najiib Barkhadle oo la hadlay warbaahinta ayaa beeniyay waraarka sheegaya in ay wada-hadal la furayaan maamulka Somaliland.
“Wax wada hadal ah kulamo jirno Somaliland, haddana kuma talo jirno, Muuse Biixi (Madaxweynaha Somaliland) iyo Maxamed Kaahin (Wasiirka Arrimaha Gudaha Somaliland), gooni u goosad ayaan u aqoonsanahay, maxaabiisna ma is dhaafsan karno” ayuu yiri Wasiirka Warfaafinta Maamulka KMG ah ee SSC Khaatumo.
Sidoo kale, Mas’uuliyiinta Somaliland ayuu ku eedeyay in ay howlan yihiin dhaqdhaqaaqyo ciidan oo ku doonayaan in ay ku soo weeraraan deegaannada SSC Khaatumo.
Maamulka SSC Khaatumo ayaa gacanta ku haya maxaabiis ay ku qabteen dagaalladii ka dhacay magaalada Laascaanood iyo deegaannada hoosyimaada, waxaana kamid ah Askar iyo Saraakiil ciidan.
