Koox hubaysan oo aan la garan ayaa Deegaanka Gorfaale oo u dhaxeeya Cada-xaar & Bulacle Gobolka Galgaduud Dowlad-Goboleedka Galmudug waxa ay ku dishay Macallin Dugsi qur’aan iyo marwadiisa oo wada joogay hoygooda.
Dilkaan oo xalay dhacay waxaa goobta ka baxsatay kooxdii dilka gaysatay waxaana markii dambe goobtaas gaaray dadka deegaanka oo kusoo baxay arrintaan kuna wargeliyay Hay’adaha ammaanka Dowlad-Goboleedka Galmudug.
Weli si dhab ah looma garan cidda ka dambaysay dilkaas balse wararka soo baxaya ayaa sheegaya in uu salka ku hayo Dilalka aanooyinka beelaha oo muddooyinkii dambe ka dhacayay deegaanno katirsan Gobolka Galgaduud.
Magaca Macallinka waxa ay ilo kala duwan ku sheegeen Macallin Cabdullaahi Cali (Jalaqle), weli ma jiro war kasoo baxay hay’adaha Ammaanka Dowlad-Goboleedka Galmudug iyo maamulka Gobolka Galgaduud inkasta oo ay socdaan howlgallo la xiriira soo qabashada kooxdaas.
Laamaha ammaanka Dowlad-Goboleedka Galmudug ayaa horay u sheegay in ay gacanta kusoo dhigi doonnaan dadka ku lugta leh dagaal-beeleedyada iyo shakhsiyaadka ka shaqeynaya iska hor keenista beelaha walaalaha ah.
