Israa’iil ayaa ku garaacday dhowr duqayn oo dhanka cirka Lubnaan ka dib markii dhowr gantaal lagu tuuray Israa’iil kuwaas oo laga soo gannay dhanka Lubnaan, taasoo ah rabshaddihii ugu xumaa tan iyo markii xabbad joojin la dhaqan geliyey bishii Noofambar.
Milateriga Israa’iil ayaa sheegay in ay duqeeyeen daraasiin gantaallo ah iyo xarun ay leeyihiin Xisbullah oo ah malleeshiyada iyo kooxda siyaasadda ee Iran taageerto, kuwaas oo ku sugnaa koonfurta Lubnaan.
Wasaaradda caafimaadka ee Lubnaan ayaa sheegtay in 7 qof oo uu ku jiro canug ay ku dhinteen duqeyntaasi halka 40 kalena ay ku dhaawacmeen.
Kooxo dhowr ah oo hubeysan ayaa ka howlgala dalka Lubnaan oo ay ku jiraan kooxaha Xisbullah iyo Falastiiniyiinta, mana jirto cid sheegatay mas’uuliyadda weerarka.
Saacado kadib weeraradii ugu horreeyay, mowjad labaad oo weeraro habeenimo ah ayaa lagu qaaday bartilmaameedyo ay ku jiraan waxa ay ciidamada Israa’iil ku tilmaameen xarumaha taliska, goobaha kaabayaasha dhaqaalaha iyo xarun lagu kaydiyo hubka ee Lubnaan
Gantaalladii Sabtidii laga soo tuuray Lubnaan ayaa yimid maalmo kadib markii Israa’iil ay xoojisay duullaanka ka dhanka ah Xamaas, oo ah xulafada Xisbullah, ee Qasa.
Milatariga Israa’iil ayaa sheegay in ka hortageen saddex gantaal magaalada Metula ee waqooyiga Israa’iil, mana jiraan wax khasaare ah oo ka dhashay.
Xisbullah ayaa sheegtay inaysan wax lug ah ku lahayn, ayna weli ka go’an tahay xabbad-joojinta.
Milateriga Lubnaan ayaa sheegay in ay burburiyeen “saddex gantaal ” oo ku dhacay koonfurta, wasiirka gaashaandhigga ee dalkaas ayaa sheegay in baaritaan lagu sameeyay weerarka.
Arrintan ayaa cadaadis ku ah xabbad joojin jilicsan, oo ay garwadeen ka ahaayeen Mareykanka iyo Faransiiska, kaas oo soo afjaray in ka badan sanad colaad u dhaxeysay Israa’iil iyo Xisbullah.
Sida uu dhigayo heshiiska xabbad joojinta, millatariga Lubnaan ayaa kumanaan askar dheeraad ah geyn doona koonfurta dalka si ay uga hortagaan kooxaha hubaysan ee weerara Israa’iil.
Xisbullah ayaa looga baahnaa in ay ka saarto dagaalyahanadeeda iyo hubkeeda, halka militariga Israa’iilna ay isaga bixi doonaan goobaha ay ku qabsadeen dagaalka.
Balse Israa’iil ayaa ku dhawaad maalin kasta weeraro dhanka cirka ah ku qaadaysa waxa ay ku tilmaantay bartilmaameedyada Xisbullah, waxa ayna tilmaantay in weerarada ay sii wadi doonaan si looga hortago in kooxdaasi ay isa soo abaabulaan.
Milatariga Israa’iil ayaa weli haysta shan goobood oo ku yaalla koonfurta Lubnaan, arrintaas oo ay dawladda Lubnaan ku sheegtay xad-gudub ku ah madax-bannaanida dalkaas iyo jabinta heshiiska.
Israa’iil ayaa sheegtay in militariga Lubnaan uusan wali si buuxda u gaarin goobahaas, loona baahan yahay in ay ku sii sugnaadaan goobahaas si loo dammaanad qaado ammaanka bulshooyinka xuduudka ku nool.
Weerarkii Sabtidii ayaa cadeyn dheeri ah u ah caqabadaha hortaagan ciidamada Lubnaan, iyagoo isku dayaya inay gacanta ku dhigaan deegaanada koonfurta oo ay Xisbullah ku leedahay joogitaan xooggan iyo taageero.
Madaxweynaha Lubnaan Joseph Aoun, oo xukunka la wareegay bishii Janaayo, ayaa sheegay in kaliya dowladda ay leedahay hubka dalka, taasoo si weyn loo fahmay inay tilmaamayso hubka Xisbullah.
Sabtidii, waxa uu dhaleeceeyay “isku dayga lagu doonayo in Lubnaan lagu jiido meerto rabshado ah”, halka ra’iisul wasaare Nawaf Salaam uu sheegay in kororka ay keentay “khatarta ah in dalka lagu jiido dagaal kale”.
Ciidamada nabad ilaalinta Qaramada Midoobay ee ku sugan Lubnaan, Unifil, ayaa sheegay in ay “ka walaacsan yihiin suurtagalnimada rabshadaha sii kordhaya”, iyaga oo ku booriyay labada dhinac Israa’iil iyo Lubnaan in ay “xaqiijiyaan ballanqaadkooda”.
Xisbullah waxaa lagu jabiyey iskahorimaadka Israa’iil, qaar badan oo kamid ah hoggaamiyaasheeda waa la dilay, boqolaal dagaalyahan ayaa la dilay waxaana la burburiyay in badan oo ka mid ah hubkeeda.
Saaxiibada caalamiga ah ee Lubnaan ayaa sheegay in ay caawin doonaan oo kaliya dalka haddii ay dawladdu ku dhaqaaqdo sidii ay u xakamayn lahayd kooxda Xisbullah oo ah kooxda ugu awoodda badan Lubnaan.
Isbullah ayaa ololaheeda billowday maalin kaddib weerarradii Xamaas ee koonfurta Israa’iil 7-dii Oktoobar 2023, iyadoo sheegtay inay u dhaqmayso si ay u garab istaagto Falastiiniyiinta ku sugan Marinka Qasa.
Iskahorimaadka muddada dheer socday ayaa cirka isku sii shareeray wuxuuna horseeday olole xooggan oo xagga cirka ah oo ay Israa’iil ka waddo Lubnaan, iyo duullaan xagga dhulka ah oo ay ku qaadday koonfurta Lubnaan.
