Madaxweynaha Kenya William Ruto ayaa Sabtdii ku dhawaaqay in isaga, madaxweynayaasha Soomaaliya iyo Uganada iyo Ra’iisul Wasaaraha Itoobiya Abiy Axmed ay ka wada hadli doonaan xiisadda ka jirta Geeska Afrika iyo sidii xal loogu heli lahaa khilaafka u dhexeeya Muqdisho iyo Addis Ababa.
Ruto ayaa hadalkaan ka sheegay shir madaxeedka 24-aad ee dalalka xubnaha ka ah Bulshada Bariga Afrika (EAC) ay ku yeesheen magaalada Arusha ee dalka Tanzania, mana uusan sheegin goorta iyo meesha uu ka dhacaayo kulanka.
Haddaba isku daygaan oo ah kii u dambeeyay ee xal loogu raadinayo khilaafka Soomaliya muxuu kaga duwan yahay kuwii hore u fashilmay iyo su’aalo kale ayuu Cabdulqaadir Maxamed Samakaab weydiiyay Cabdullaahi Sheekh Cabdirisaaq oo fallanqeeya arrimaha siyaasadda Geeska Afrika, madaxna ka ah hay’adda cilmi baarita ee Brightview International.
