Madaxweyne cusub ee Itoobiya, Taye Atske Selassie oo khudbad dhinacyo badan taabaneysay kaga hadlay xaaladda geeska Afrika iyo heshiiska ay la galeen maamulka Somaliland.
Isagoo ka hadlayay fadhiga wadajirka ah ee Golaha Shacabka iyo Golaha Federaalka, ayuu muujiyey sida ay Ethiopia u taageereyso xasilloonida gobolka iyo isku xirka dhaqaalaha.
Mar uu ka hadlay heshiiska Somaliland ay la saxiixdeen ee la xiriiray badda, wuxuu sheegay in uu yahay mid faa’iido ugu jirto labad dhinac, isla markaasna ay ka shaqeynayaan meelmarintiisa.
Heshiiskaasi ayaa waxaa si weyn uga horyimid shacabka iyo dowladda Soomaaliya oo ku tilmaamay mid dhaawac ku ah midnimada iyo madaxbannaanida Soomaaliya.
Ku adkeysiga Itoobiya ee heshiiskaasi ayaa sababay in ay natiijo la’aan ku soo dhammaadaan wada hadallo loo furay madaxda Soomaaliya iyo Itoobiya si loo xalliyo xiisadda taagan.
