Wararka ka imaanay Degmada Xarfo ee Gobolka Mudug dhanka Dowlad-Goboleedka Puntland ayaa kusoo warramaya in halkaas uu dhacay dagaal dhexmaray labo maleeshiyo beeleed oo walaalo ah oo isku qabsaday ceel biyood.
Inta la xaqiijiyay labo ruux ayaa geeriyootay halka tiro kale oo aan xogtooda la helin waa ay ku dhaawacmeen kaddib markii maleeshiyaadka labada dhinac ee is haya ay ku dagaalameen degmada Xarfo ee Gobolka Mudug.
Rag hubeysan ayaa gubay matoorkii biyaha looga soo saarayay halka ay duugeen ceelka sida ay xaqiijiyeen ilo kala duwan, xiisadda ayaa cirka isku sii shareertay waxaana laga cabsi qabaa in waxyeello kale ay dhaliso.
Mas’uuliyiin katirsan Dowlad-Goboleedka Puntland oo u istaagay arrintaan xal u helisteeda ayaa billaabay kulamo ay la qaadanayaan duubabka dhaqanka si loo kala dhexgalo maleeshiyaadkaan loona helo xabbad-joojin.
