Madaxweynaha Jamhuuriyadda Federaalka Soomaaliya Xasan Sheekh Maxamuud oo Magaalada Kampala kula kulmay dhiggiisa Uganda Yoweri Museveni waxa ay kawada hadleen Xaaladda Dalka, howlgalka cusub ee AUSSOM, Amniga, Siyaasadda, Ganacsiga & qodobo kale.
Sida lagu sheegay qoraal kasoo baxay Madaxtooyada Soomaaliya, Madaxweyne Xasan Sheekh Maxamuud iyo Museveni waxa ay si qoto dheer u dul istaagay howlgalka Midowga Afrika ee gabagabada ah ee ATMIS iyo sida loola jaanqaadi karo kan cusub ee billaabanaya 2025.
Qodobada kasoo baxay kulanka waxaa kamid ah Xoojinta Iskaashiga dhinacyada Amniga, Ganacsiga, Horumarka iyada labada Dowlad ay diiradda saarayaan iskaashiga Ganacsi iyo kan maalgashi sida hadlaka loo dhigay.
Dhanka ciidamada Afrikaanka ah ee Soomaaliya jooga waxa ay diiradda saareen sidii loo taageeri lahaa Ciidamada Ammaanka Soomaaliya si ay mustaqbalka dhow ula wareegaan mas’uuliyadda amniga Dalkooda.
Uganda waa dalkii ugu horreeyay ee Ciidamo Afrikaanka usoo diray Soomaaliya horraantii sanadkii 2007dii, xiligaas waxaa dalka joogay Ciidankii Itoobiyaanka ahaa ee dagaallada adag ku galay Muqdisho iyo Gobollada kale ee Soomaaliya.
Dalka Uganda waxaa Soomaaliya ka jooga ciidamo ku howlgalla saddex qaab oo kala ah, Militariga ATMIS, kuwa Booliiska ah ee isla howlgalkaas iyo ciidan gaar ah oo ilaaliya xarumaha Qaramada Midoobay ee Muqdisho.
