Ra’iisul Wasaaraha Xukuumadda Federaalka Soomaaliya Xamsa Cabdi Barre iyo Wafdi uu hoggaaminayo ayaa ku wajahan Gobolka Jubada Hoose Dowlad-Goboleedka Jubbaland gaar ahaan Deegaanka Buula Xaaji.
Wafdi hordhac u ah Ra’iisul Wasaare Xamsa ayaa gaaray Magaalada Kismaayo Xarunta Kumeel-gaarka ah ee Dowlad-Goboleedka Jubbaland sida ay Mustaqbal u xaqiijiyeen ilo kala duwan waxaana ay usii gudbayaan dhanka Buula Xaaji.
Ilo ku dhow Safarka Xamsa Cabdi Barre ayaa Mustaqbal u sheegay in Xukuumadda Federaalka ay dhiirragelinayo Ciidamada Federaalka ee DANAB & Kuwa Daraawiishta Dowlad-Goboleedka Jubbaland ee sida wadajirka ah u howlgalaya.
Wasiirka Koowaad ee Xukuumadda Federaalka Xamsa Cabdi Barre ayaa safarkii kan ka horreeyey uu ku tagay deegaannada Dowlad-Goboleedka Jubbaland waxa uu ahaa Dabayaaqadkii Nofeembar sanadkii hore ee 2023.
Xiligaas waxa uu Gobolka Jubada Hoose u tagay u kuurgalidda xaaladaha Bani aadamnimo ee ka dhashay Daadadkii roobka xoogganaa ee Dalka ka da’ay waxaana la socday wufuud kale oo ka socday Hay’ado howshoodu tahay gargaarka bani aadamnimada.
