Wabiga Shabeelle ayaa ku fatahay magaalada Beledweyne oo ah xarunta gobolka Hiiraan ee dowlad gobaleedka Hirshabeelle, iyada oo qeybo ka mid ah magaalada durbadiiba laga dareemay saameyntiisa.
Sawirro laga soo qaaday magaalada Beledweyne ayna faafisay wakaaladda wararka Soomaaliya ee SONNA ayaa la arkayey magaalada oo ku fatahay Wabiga xilli digniino ay soo saartay Hay’adda Maareynta Musiibooyinka Qaranka.
Magaaladaan madaxa u ah gobolka Hiiraan ayaa u nugul fataahadda wabiga, waxaana markasta uu geystaa qasaare kala duwan oo u badan mid hanti, waxaana xusid mudan in dadka deegaanka ay u guuraan magaalada banaankeeda.
Hay’adda Maareynta Musiibooyinka Qaranka ee SODMA ayaa soo saartay digniino ku aadan fatahaad iyo daadad ka dhasha Roobka Guga ee ka curtay qaar ka mid ah gobollada dalka, iyada oo ugu baaqday dadka degan hareeraha wabiyada in ay isaga guuraan, si uu u yaraado qasaaraha.
