Xoghayaha Arrimaha Dibadda ee Mareykanka, Marco Rubio, ayaa Sabtidii ka dagay dalka Panama, isaga oo bilaabay safarkiisii ugu horreeyay ee rasmiga ah tan iyo markii loo magacaabay xilka xoghayaha arrimaha dibadda ee dalka. Socdaalkiisa waxa uu ku mari doonaa Panama, El Salvador, Costa Rica, Guatemala, iyo Jamhuuriyadda Dominika, laga bilaabo Sabtidii ilaa Khamiista.
Rubio wuxuu la kulmi doonaa madaxweynayaasha dalalka uu booqanayo, oo ay ka mid yihiin Madaxweynaha Panama, Jose Raul Mulino; Madaxweynaha El Salvador, Nayib Bukele; Madaxweynaha Costa Rica, Rodrigo Chaves; Madaxweynaha Guatemala, Bernardo Arévalo; iyo Madaxweynaha Jamhuuriyadda Dominika, Luis Abinader.
Sida uu sheegay Ergayga Gaarka ah ee Mareykanka u qaabilsan Latin America, Mauricio Claver-Carone, booqashadan waxay noqonaysaa markii ugu horreysay ee in ka badan 100 sano uu Xoghayaha Arrimaha Dibadda ee Mareykanka safarkiisii ugu horreeyay ku bilaabo gobolka Latin America.
Mas’uuliyiinta iyo khubaradu waxay sheegayaan in socdaalkan uu qayb ka yahay dadaalka Mareykanka ee lagu xakameynayo saameynta sii kordheysa ee Shiinaha ku leeyahay gobolka. Safarku wuxuu ku soo beegmayaa xilli Madaxweyne Donald Trump uu dadaal ugu jiro in Mareykanku dib ula wareego gacan ku haynta Kanaalka Panama, iyo xilli Washington ay xoojineyso dadaallada lagu yareynayo socdaalka sharci-darrada ah.
Trump wuxuu ku andacooday in Shiinuhu gacanta ku hayo Kanaalka Panama, kaas oo ah marin ganacsi oo muhiim ah oo isku xira Badaha Atlantic iyo Pacific. Balse Panama waxay beenisay sheegashadan, iyada oo caddeysay in ay si dhex-dhexaad ah u maamusho kanaalka, marka loo eego dhammaan maraakiibta ganacsiga.
Khamiistii, Rubio wuxuu ka digay in Shiinuhu xannibi karo galaangalka loo helayo kanaalka haddii uu dhaco dagaal.
“Haddii dowladda Shiinaha ay xoog ku amarto inay xirto Kanaalka Panama, waa in la fuliyo. Runtiina, wax shaki ah igagama jiro inay haystaan qorshayaal degdeg ah oo ay sidaas ku sameyn karaan. Tani waa khatar toos ah,” ayuu yiri Rubio intii lagu jiray wareysi uu siiyay SiriusXM Radio.
Magaalada Panama, Madaxweyne Mulino wuxuu meesha ka saaray suurtagalnimada in wax wada-hadal ah laga yeesho arrinta kanaalka.
“Ma awoodi karo inaan galo wada-xaajood ku saabsan kanaalka, mana furi karo wax geeddi-socod ah oo la xiriira arrintaas,” ayuu u sheegay saxafiyiinta Khamiistii. “Arrintaas waa la xidhay. Kanaalku Panama ayaa iska leh.”
Jimcihii, Claver-Carone wuxuu ka digay joogitaanka sii kordhaya ee shirkadaha Shiinaha ee ka hawl gala aagga kanaalka, laga bilaabo dekadaha ilaa kaabayaasha isgaarsiinta. Wuxuu ugu yeeray arrin culus oo khatar ku ah amniga qaranka Mareykanka, Panama, iyo guud ahaan cirifka galbeedka ee dunida.
Khubaro qaarkood waxay ka digeen in Shiinuhu adeegsado xeelado dhaqaale iyo kuwo kale si uu saameyn uga helo Latin America, taasoo dhalisay walaacyo la xiriira amniga qaranka.
“Waxaad filan kartaa maalgelin badan oo Shiinaha ka timid, laakiin si tartiib ah waxaad isugu arkaysaa in lagugu khasbayo ama lagugu dhirrigelinayo inaad saxiixdo heshiiska Belt and Road Initiative, ama heshiis kale oo Shiinaha siinaya saameyn weyn oo ku saabsan kaabayaashaada isgaarsiinta,” ayuu yiri Ryan Berg, oo ah Agaasimaha Barnaamijka Americas ee Machadka Daraasaadka Istiraatiijiyadda Caalamiga ah, intii lagu jiray dood khadka internet-ka ah oo Khamiistii la qabtay.
Mashruuca Belt and Road Initiative (BRI) waa hindise ballaaran oo uu Shiinuhu bilaabay 2013, kaas oo uu hogaaminayo Madaxweyne Xi Jinping, ujeedadiisuna tahay isku xirka qaarado badan iyada oo la adeegsanayo marinno dhul iyo kuwo badeed. Mareykanka wuxuu ka digay in BRI uu yahay istiraatiijiyad uu Shiinuhu u adeegsanayo inuu ku maamulo una daciifiyo nidaamka ganacsiga caalamiga ah ee xeerarka caalamiga ah ku dhisan, si uu uga faa’iidaysto.
Maalgelinta tooska ah ee Shiinaha (FDI) ee Latin America iyo Caribbean-ka ayaa si weyn u korodhay, sida uu sheegay Berg, isaga oo xusay in 15-kii sano ee la soo dhaafay, maalgelinta Shiinaha ay gaartay qiyaastii $160 bilyan.
