Qasnadda Maraykanka ayaa cunaqabatayn ku soo rogtay saddex shirkadood oo Suudaan laga leeyahay oo ay sheegtay inay maal-gelinayaan dagaalka khasaaraha badan dhaliyay ee dalkaas ka socda.
Kuwa la cunaqabateeyey waxaa ka mid ah Bankiga Alkhaleej iyo Al-Fakher Advanced Works, oo ay gacanta ku hayaan Ciidamada Gargaarka Degdegga ah (RSF).
Shirkadda saddexaad, Zadna International, waxay ku xiran tahay ciidammada Suudaan, sida lagu sheegay bayaan ka soo baxay waaxda maaliyadda ee Maraykanka Arbacadii.
War-saxaafadeedka ayaa lagu sheegay in saddexdan hay’adoodba ay wiiqeen nabadda, amniga, iyo xasilloonida Suudaan iyagoo lacag dhaqday ama dhaqaale ka soo ururiyay dhoofinta dahabka.
Cunaqabataynta ayaa qayb ka ah tillaabooyinka loogu talagalay in lagu hakiyo dagaalka sagaalka bilood ka socda Sudan.
In ka badan 12,000 oo qof ayaa ku dhintay ku dhawaad siddeed milyan oo qofna way ka carareen guryahoodii colaadda awgeed, sida ay sheegtay Qaramada Midoobay.
