Dowladda Federaalka Soomaaliya ayaa markii ugu horreysay ka hadashay diyaarad siday shaqaale ka tirsan Qaramada Midoobay, taas oo ku dhacday deegaan ay gacanta ku hayaan Al-Shabaab.
Warka ka soo baxay dowladda Soomaaliya kaas oo lagu faafiyey warbaahinta dowladda ataa lagu yiri, “Diyaarad kuwa qumaatiga u kaca (helicopter) oo ay leedahay Qaramada Midoobay, loona adeegsado dhanka gurmadka degdegga ah oo caawineysay Dowladda Federaalka Soomaaliya ayaa ku dhacdey goob ku taalla Dowlad Goboleedka Galmudug oo ay ka taliyaan Al-Shabaab.”
Sidoo kale warka ka soo baxay dowladda Soomaaliya ayaa lagu sheegay “In diyaaradda ay la soo gudboonaatey cillad farsamo, kadibna ay halkaasi ku dhacdey,” wallow aysan dowladda xogo intaas ka dheer aysan bixin.
Waxaa diyaaradda saarnaa 8 shaqaale ah oo isugu jiray ajnabi iyo Soomaali. Iyadoo Ciidamada Qalabka Sida ay ku guda jiraan badbaadinta shaqaalihii saarnaa diyaaradda, ayaa waxan idin idin la soo wadaagi doonnaa hadba waxa ku soo kordha dhacdadan, ayaa lagu soo gabagabeeyey warka ka soo baxay dowladda.
Galinkii dambe ee shalay ayaa diyaaradda oo ka soo kacday magaalada Beledweyne ee gobolka Hiiraan ayaa ku sii jeeday magaalada Wisil ee gobolka Mudug balse waxa ay ku dhacday deegaan Xiindheere oo ka tirsan gobolka Galgaduud, oo masaafo yar u jirta halkii ay ka soo kacday diyaaradda.
