Dadka Yuhuudda ah ee qaarkood Xamaas ka qafaalatay xubno katirsan ehelkooda iyo kuwo kale oo doonaya in la badbaadiyo ciidamada cusub ee goobaha dagaalka loo daabulayo ayaa Xukuumadda Benjamin Netanyahu ka dalbaday in ay is casisho isla markaana joojiyo dagaalka.
Waxa ay Dadkaan soo qaateen boorar lagu sawiray Ra’iisul Wasaraare Netanyahu oo wajigiisa dhiig badan ay ku daadiyeen iyaga oo ku dhawaaqayay ereyo si toos ah uga dhan ah Golaha Xukuumadda Dagaalka ee loo aasaasay dagaalladaas socda.
Sidoo kale waxa ay u sacbo-tumeen in markale la furo wadahadal lagu soo daynayo Maxaabiista maadaama xalka keliya ee muuqda uu yahay in wada-xaajood Maxaabiis is dhaafsi ah la sameeyo haddii kale la haystayaashu ku dhiman doonnaan rasaasta ciidankooda.
Afhayeenka Xamaas Abuu Cubayda oo dhowaan Warbaahinta la hadlay ayaa sheegay in Dadka ay haystaan wajahayaan halis badan oo uga imaanaysa dhinaca Militariga Israaiil kuwaas oo qarka u saaran in ay ku ruux baxaan gantaallada duqaymaha ay u adeegsanayaan Yuhuudda.
