Mid ka mid ah dadka ugu caansan Yurub ee dadka tahriibiya ayaa lagu xiray dalka Ciraaq kadib dabagal ay BBC-du ku sameysay.
Barzan Majiid ayaa lagu xiray gobolka Kurdistan ee Ciraaq subaxnimadii Axadda, sida uu sheegay sarkaal sare oo ka tirsan dowladda.
Muddo dhowr sano ah, isaga iyo kooxdiisii waxay si weyn ugu lug lahaayeen ganacsiga dadka ku tahriibiya – doomaha iyo gawaarida xamuulka – guud ahaan Kanaalka Ingiriiska.
BBC-da ayaa Majeed – oo sidoo kale loo yaqaan Scorpion – ka raadisay magaalada Sulaymaaniya, halkaas oo uu sheegay in uu kumanaan tahriibayaal ah ka soo qaaday kanaalka.
“Malaha kun, malaha 10,000. Ma garanayo, ma tirin,” ayuu yiri.
Xubin sare oo ka tirsan maamulka gobolka Kurdistan ayaa sheegay in saraakiisha ay u suurtagashay in baritaanka ay BBC-du soo saartay ay ku helaan Majeed.
