Weerar ku dhacay Gobolka Borno ee Waqooyiga Dalka Nigeria ayaa sababay dhimashada ugu yaraan 18 ruux iyo dhaawaca dad kor u dhaafaya 30 qof waxaana suuragal ah in khasaaraha uu intaas kasii kordho maadaama weerarkaas uu xoogganaa.
Goobta weerarka ka dhacay waxaa ka socday Xaflad meher ah waxaana ku sugnaa Dad badan oo ah ehelka iyo Asaxaabta lamaanaha sameysanayay Xafladdaas sida ay xaqiijiyeen mas’uuliyiin katirsan Hay’adaha Amniga Nigeria.
Ku dhowaad 15 sano waxaa Gobolka Borno ka dhacaya weeraro ay ku dhiig-baxeen Dad badan oo rayid ah waxaana mas’uuliyadda weerarradaas qaarkood sheegatay Kooxda Boko haram ee dagaalka kala soo horjeedda Dowladda Nigeria.
In ka badan 2 Milyan oo ruux ayaa Gobolkaas naftooda kala baxsatay kaddib markii joogto ay ka noqdeen weerarrada Boko Haram, Kooxdaan ayaa indhaha caalamka soo jeedisay sanadkii 2014kii waxaana xigay howlgalkii caalamiga ahaa ee lagu beegsaday.
Afduubka Ardayda, Dadka reer Miyiga, beegsiga Saldhigyada Ciidanka & Goobaha Bulshadu ku badan tahay waa meelaha inta badan Dadka Nigeria gaar ahaan Gobolka Borno ku xusuusataan Kooxda Boko Haram sida hadalka loo dhigay.
