Wasaaradda arrimaha dibadda iyo Iskaashiga Caalamiga ah ee Xukuumadda Federaalka Soomaaliya ayaa qoraal ay soosaartay waxa ay ku baaqday in xal degdeg ah loo helo xiisadda ka ololaysa Bariga Dhexe.
Wasaaraddu waxa ay sheegtay in ay garab taagan tahay dhinaca nabadda isla markaana codkeeda ay ku biirinayso dhinacyada soo jeedinaya in wadahadal lagu dhammeeyo ama lagu soo afjaro dagaalka gacan-qaadka gaaray.
Marka kale ayay Soomaaliya ku celisay in mowqifkeeda ah in Dowlad ay hesho Falastiin ay si buuxda u ayidsan tahay si ay Shacabku uga baxaan xaaladaha adag ay wajahayaan sida loo dhigay warka kasoo baxay Wasaaradda Arrimaha Dibadda XFS.
Xiisadda soo jiitamaysay ee u dhaxaysay Iiraan iyo Israaiil ayaa isku rogtay mid gacan ka hadal ah kaddib markii Yuhuuddu ay beegsatay saraakiil katirsan Dowladda Kacaanka halka Tehran ay habeen kahor bixisay jawaab oo waxa ay duqaysay Israaiil.
Waxaa laga cabsi qabaa in Colaadda Bariga Dhexe oo muddo dheer taagan marka laga tusaale qaato tan iyo markii uu billowday dagaalka u dhaxeeya dhinacyada is diidan uu isu baddelo dagaal wayn oo saamayntiisa wata.
