ABUJA — Ugu yaraan 42 dhimasho ah ayaa la diiwaan galiyay kadib markii uu cudurka jadeecada ka dillaacay muddo toddobaad gudihiis ah gobolka Adamawa ee waqooyi bari Nigeria, sida uu sheegay guddoomiyaha caafimaadka ee gobolkaas Jimcihii.
Jadeecada waa fayras hawadu qaado oo aad u faafa oo inta badan ku dhaca carruurta da’doodu ka yar tahay shanta sano.
Cudurkan ayaa lagaga hortagi karaa laba qiyaasood oo tallaalka ah, iyada oo in ka badan 50 milyan oo dhimasho ah ayaa laga badbaadiyay tan iyo 2000, sida uu sheegtay Ururka Caafimaadka Adduunka.
Felix Tangwami, oo ah gudoomiyaha caafimaadka ee gobolkaas, ayaa sheegay in cudurka jadeecada uu inta badan saameeyay laba goobood, halkaas oo 42 dhimasho ah laga diiwaan geliyay, ku dhawaad 200 oo xaaladood oo kalena looga shakisan yahay.
Nabadgelyo darro baahsan oo ka jirta gobollo badan oo woqooyiga Nigeria ah ayaa inta badan lagu eedeeyaa carqaladaynta ololaha tallaalka, taasoo ka dhigeysa carruurta inay si gaar ah u nugul yihiin.
Reuters.
