Dowladda Shiinaha ayaa sheegtay in ay ka soo horjeeddo isku day kasta oo lagu kala qaybinayo dhullka Soomaaliya, sida ay baahisay wasaaradda arrimaha dibadda maanta oo Isniin ah. Shiinaha ayaa xaqiijiyay in ay taageersanyihiin madax-bannaanida, midnimada iyo ilaalinta dhuleed ee dalka Bariga Afrika.
“Ma aha in dal uu ku dhiirrigeliyo ama ku taageero, danihiisa awgood, xoogagga gooni-u-goosadka ee gudaha dalal kale,” ayuu yiri afhayeenka wasaaradda arrimaha dibadda, Lin Jian, oo la hadlayay wariyeyaasha shir, isaga oo ugu baaqay mas’uuliyiinta Somaliland inay joojiyaan “hawlaha gooni-u-goosadka iyo isbahaysiga ay la leeyihiin xoogag dibadeed.”