Dalalka Mali iyo Burkina Faso ayaa sheegay in aysan dalalkooda soogali karin muwaadiniinta Mareykanka iyagoo taas uga jawaabaya tallaabada uu qaaday maamulka Trump.
Maamulka Trump ayaa labada dal ee ku yaal galbeedka Afrika dhawaan saaray xayiraad buuxda oo dhanka safarka ah.
Wasiirka arimaha dibadda Burkina Faso, Karamoko Jean-Marie Traoré, ayaa sheegay in dowladiisa ay qaadatay tallaabo la mid ah tan Mareykanka halka wasaarada arrimaha dibadda Mali ay ku baaqday “in si siman laysu ixtiraamo”.
Go’aanada Mali iyo Burkina Faso waxay soo baxeen maalmo kaddib markii wakaalada wararka ee Niger ay sheegtay in Niger ay xayiraad safarka ah saartay muwaadiniinta Mareykanka.
Saddexda dal waxaa maamulo militir xoog ku qabsaday xukunka oo riday dowladihii ka talinayay dalalkaas.
Horaantii bishan ayey Aqalka Cad Mareykanka sheegeen in xayiraad buuxda ay saareen dadka kas oo jeeda saddexdan dal iyo sidoo kale dalalka Sudan-ta-koonfureed, Syria iyo Falastiin.
Go’aanka Mareykanka ayaa dhaqangalaya maanta oo ah 1-da bisha Janaayo, waxaana la sheegay in ujeedkiisu yahay “ilaalina ammaanka” Mareykanka sida ay sheegeen.
Aqalka Cad waxay sheegeen in xayiraada aan la qaadeyn ilaa dalalka ay saameysay ay muujinayaan “horumar lagu kalsoonaan karo” oo ku saabsan sida loo maareeyo jinsiyadaha, xog-wadaaga iyo iskaashiga ay la leeyihiin qeybaha socdaalka Mareykanka.