Saif al-Islam Gaddafi, oo ahaa wiilka hoggaamiyihii hore ee Liibiya Col Muammar Gaddafi, ayaa la soo weriyay in la dilay.
Geerida ninkan 53 jirka ahaa, oo mar si weyn loogu arkayay inuu ahaa dhaxal-sugaha aabbihii, waxaa maanta shaaciyay koox ay isku dhawaayeen , sida ay werisay Wakaaladda Wararka Liibiya.
Walaashiis ayaa u sheegtay telefishinka Liibiya in uu ku dhintay meel u dhow xadka dalka uu la wadaago Algeria, balse ma aysan xaqiijin sida uu u dhintay.
Ilaa hadda ma cadda sababta dhimashadiisa, iyadoo warar is khilaafsan ay ku faafayaan warbaahinta Liibiya.
Saif al-Islam Gaddafi muddo dheer ayaa loo arkayay shakhsiga ugu saameynta badan lagana cabsado dalka, marka laga reebo aabbihii, kaas oo xukumayay Liibiya laga soo bilaabo 1969 ilaa laga riday laguna dilay kacdoon dhacay sanadkii 2011.
Wuxuu dhashay sanadkii 1972, wuxuuna door muhiim ah ka qaatay isu soo dhowaanshaha Liibiya iyo waddamada Reer Galbeedka intii u dhexeysay 2000 ilaa burburkii xukunkii Gaddafi.
Ka dib markii aabbihii xilka laga tuuray, Saif al-Islam Gaddafi, oo lagu eedeeyay inuu door weyn ku lahaa caburinta arxan-darrada ah ee mudaharaadyadii ka dhanka ahaa dowladda , waxaa ku xiray maleeshiyo kale oo iska soo horjeeday magaalada Zintan muddo ku dhow lix sano.
Maxkamadda Caalamiga ah ee Dambiyada (ICC) ayaa dooneysay in maxkamad la saaro, iyada oo ku eedeysay dambiyo ka dhan ah bani’aadamnimada, kuwaas oo la xiriira doorkiisii lagu eedeeyay ee lagu caburinayay mudaharaadyadii mucaaradka sanadkii 2011.